തിരുവനന്തപുരം: ടാറ്റ നിക്ഷേപ വിവാദത്തില് വിശദീകരണക്കുറിപ്പുമായി സംസ്ഥാന സര്ക്കാര്. മിഷന് സമുദ്രയുടെ ഭാഗമായ ആകെ നിക്ഷേപത്തിന്റെ വ്യാപ്തിയെയാണ് 10,000 കോടിയോളം രൂപയുടെ നിക്ഷേപ സാധ്യതയെന്ന് മുഖ്യമന്ത്രി ചൂണ്ടിക്കാട്ടിയതെന്നും ടാറ്റയുടെ ഏക നിക്ഷേപ കരാര് അന്തിമമായി ഉറപ്പിച്ചിട്ടില്ലെന്നും സര്ക്കാര് പ്രസ്താവനയിലൂടെ അറിയിച്ചു.
മിഷന് സമുദ്രയുടെ ഭാഗമായി രാജ്യത്തെ പ്രമുഖ കപ്പല് നിര്മ്മാണ-സമുദ്ര വ്യവസായ കേന്ദ്രമായി കേരളത്തെ വികസിപ്പിക്കുന്നതിനുള്ള സര്ക്കാരിന്റെ കാഴ്ച്ചപ്പാടും നിക്ഷേപ ആകര്ഷണ പദ്ധതിയുമാണ് മുഖ്യമന്ത്രി അഭിമുഖത്തില് പരാമര്ശിച്ചത്. വിവിധ പദ്ധതികളിലൂടെയും വിവിധ നിക്ഷേപകരിലൂടെയും വരും വര്ഷങ്ങളില് സംസ്ഥാനത്തേക്ക് ആകര്ഷിക്കാന് സര്ക്കാര് ലക്ഷ്യമിടുന്ന ആകെ നിക്ഷേപത്തിന്റെ വ്യാപ്തിയെയാണ് 10,000 കോടിയോളം രൂപയുടെ നിക്ഷേപ സാധ്യതയെന്ന പരാമര്ശത്തിലൂടെ മുഖ്യമന്ത്രി സൂചിപ്പിച്ചത്. അല്ലാതെ ഏതെങ്കിലും ഒരുസ്ഥാപനവുമായി ഇത്രയും തുകയുടെ ഏകനിക്ഷേപ കരാര് അന്തിമമായി ഉറപ്പിച്ചുവെന്നല്ല അര്ത്ഥമെന്നും പ്രസ്താവനയില് പറയുന്നു.
കേരളത്തില് കപ്പല് നിര്മ്മാണ മേഖലയില് നിക്ഷേപം നടത്താന് സന്നദ്ധത അറിയിച്ചെന്ന മുഖ്യമന്ത്രി വി ഡി സതീശന്റെ അവകാശ വാദം തള്ളി ടാറ്റ ഗ്രൂപ്പ് തന്നെ രംഗത്തെത്തിയിരുന്നു. കേരളത്തിലെന്നല്ല ഒരിടത്തും കപ്പല് നിര്മ്മാണ ശാല നിര്മ്മിക്കില്ല. ടാറ്റ ഗ്രൂപ്പിന് നിലവില് കപ്പല് നിര്മ്മാണ പദ്ധതികളൊന്നുമില്ലെയിരുന്നു ടാറ്റ ഗ്രൂപ്പ് പറഞ്ഞത്. ഇക്കണോമിക്സ് ടൈംസാണ് ഇത് സംബന്ധിച്ച വാര്ത്ത നല്കിയിരിക്കുന്നത്. ബ്ലൂംബെര്ഗിന് നല്കിയ അഭിമുഖത്തിലായിരുന്നു കേരളത്തില് കപ്പല് നിര്മ്മാണ മേഖലയില് നിക്ഷേപം നടത്താന് ടാറ്റ സന്നദ്ധത അറിയിച്ച കാര്യം മുഖ്യമന്ത്രി പറഞ്ഞത്.
Content Highlights: Kerala Government Issues Clarification on Tata Investment Controversy